GUL KUTAR AYOL...

Qoshida qanchalar bo‘lmang gunohkor,
Ko‘z yumib, barchasin, unutar ayol.
Do‘stlarim, aytaman, bitta siri bor:
Sakkizinchi martda - gul kutar Ayol.

Qo‘llariga xina qo‘ymasa, mayli,
Egniga shox atlas kiymasa, mayli,
Sirg‘aga qulog‘in o‘ymasa, mayli,
Sakkizinchi martda - gul kutar Ayol.

Suv o‘tsa bildirmay, patak soladi,
Kemtik kovushini yamab oladi,
Ko‘p narsa tilamas, ko‘ngli qoladi,
Sakkizinchi martda - gul kutar Ayol.

Tandirda non yopar, ko‘zi achishib,
Gul kabi qovjirab, yuzi tirishib,
Ketmasin, desangiz, ichidan cho‘kib,
Sakkizinchi martda - gul kutar Ayol.

Kamingiz, yo‘q joydan topib yurgan zot,
Ro‘zg‘oringiz uchun, chopib yurgan zot,
Bir dona gul bilan yuragi obod,
Sakkizinchi martda - gul kutar Ayol.

Kerakmas, zar ro‘mol o‘ramaydilar,
Bolam, deb, o‘zi uchun
yashamaydilar...
Bizdan dunyolarni so‘ramaydilar,
Sakkizinchi martda - gul kutar Ayol.

Allohim yaratgan, nomi ojiza,
Ayol tengsiz neʼmat - buyuk mo‘jiza,
Yilda bir bayramda, arzir o‘ksisa,
Madhiga gar, Murod, sheʼrlar o‘qisa:
Sakkizinchi martda - gul kutar Ayol.

Qiziltog‘ shoiri:
Murodjon Jo‘rayev

Kanalga ulanish👉@MMNizomitdinov