Umr Falsafasi

Bo‘lmasa ham koshona qasr,
Yillar o‘tsin, hoh bo‘lsin asr.
Do‘stlar ochay sizga o‘shal sir,
Ota uyning fayzi boshqacha!

Yashayapmiz qayda, qayzamon,
Chorlayverar o‘ziga yomon.
Qancha shirin xotiralarga kon,
Ota uyning fayzi boshqacha!

Inson orzu qilmasin neni,
Olislarda angladim shuni.
Ayvonida qaldirg‘och ini,
Ota uyning fayzi boshqacha!

Hovlida bir bola yugurar,
Yoshligimni eslatib turar.
Rayhonlarning hidi ufurar,
Ota uyning fayzi boshqacha!

Devorlari nurab ketsa ham,
Ustunlari qulab ketsa ham.
Mayli ko‘rimsiz, eski bo‘lsa ham,
Ota uyning fayzi boshqacha!

Unda otam siymolari bor,
Onajonim duolari bor,
Opa-singil ibolari bor,
Aka-ukam diydorlari bor,
Ota uyning fayzi boshqacha!

Ey, jigarim chekma firog‘in,
Ko‘zlaringga surtgin tuprog‘in.
O‘chmasinda yongan chirog‘i,
Ota uyning fayzi boshqacha!

Oh, tandirdan uzilgan noni,
Choy qaynatar misli o‘chog‘i.
Sog‘indimey otam-u, onam,
Ota uyning fayzi boshqacha!

@Umr_Falsafasi 💋

📱Qanday yaxshi ekan bolalik...

Nima qasding bor edi menda,
Nega buncha qilmading shavqat,
Qo‘rqmadingmi Parvardigordan?!
O‘yin bo‘ldi senga muhabbat.

Yuragimni kaftinga olib,
Kulol kabi ming ko‘yga solding.
Juda og‘ir, juda ham og‘ir,
Gunohlarni bo‘yningga olding.

Uyalmasdan olasan ham tan,
Va so‘zlaysan buni maqtanib.
Bu yog‘iga qanday yashaysan,
Yolg‘onlarga cho‘kib, bulg‘anib.

Oylar, kunlar qilolmading bas,
Masxaralab qalbni jo‘rtaga.
Qasamlar ham senga cho‘t emas,
Xudoni ham qo‘yding o‘rtaga!

Senga nima qilgan edim, ayt,
Nega meni olding nishonga.
Qancha sendan jabr chekkanlar,
Seni sevib, senga ishongan!?

Ko‘ksingdagi toshmi, yurakmi,
Yo Xudodan qo‘rqmaysanmi hech.
Insof bormi senda ozgina,
Tavbalar qil bo‘lmasidan kech.

Qancha balo keldi boshimga,
Qancha topdim sen deb talofat.
Qaytar dunyo qaytadi bir kun,
Bir kun qattiq o‘ch olar hayot.

Malika Salimova

@Umr_Falsafasi 🌱

Yaxshi odam, zo‘r odam.
Bolalarimning dadasi,
Ammo meni kuydirgan,
Shu odamning zardasi.

Arzimagan narsaga.
Fe’li kelib qoladi,
Qo‘liga nima kirsa,
O‘sha bilan soladi.

Avlod-u, ajdodimni
Birma-bir "o‘qib " chiqar,
Bolalarniyam xatto,
Erinmay so‘kib chiqar.

Men aybdor, men yomon,
O‘zi oppoq, guldasta,
Shuncha yillik xotinin
Loyga bular bir pasta.

Qo‘yar zumda dunyoni,
Gʻalva bilan to‘ldirib,
Alamimdan shu tabda,
Qo‘ygim kelar o‘ldirib.

Ammo "g‘iring" demasdan,
Pasayishin kutaman,
Olishsam yomon bo‘lar,
Indamasam yutaman.

Ba’zan yurar yo ko‘zim,
Yo peshonam ko‘karib,
Jahl ketgach "kechir" der,
Qo‘llarini ko‘tarib.

Opam javrar eshitib:
-Insof bilan turti, ur,
Bitta gapga shunchalik,
Qiladimi, yer yutgur!

Erga qiron kelganmi?!
Ayriladi, ketadi,
Onam aytar: -O‘lsayam,
Bitta bilan o‘tadi!                  

Sabr qilmay yomonga,
Yaxshisiga qochasan,
Qo‘yib bersa senlarga,
Er bozori ochasan.

Opam der: -Gulday ayol,
So‘lib ketsa maylimi?
Shu zolimning qo‘lida,
O‘lib ketsa maylimi?

-Eri-xotin urishi-
Doka ro‘mol qurishi!
O‘zgarmadi hech erim,
O‘sha-o‘sha turishi.

Bir kun yana urishdi,
Yoqmay pishirgan oshim,
Lagan bilan bir soldi,
Yorilay dedi boshim.

Yigirma yil yashadim,
Chidab kaltaklariga,
Jondan o‘tdi bu safar,
Qo‘l siltadim bariga.

Qaror qildim:- Ketaman!
Xuvillasin xonasi,
Erim dedi: -Ketmagin,
Pul beraman, onasi.

Pul daragin eshitib,
Qizim tushdi yodimga,
"Ko‘ylak olib bering" deb,
Tegyotgandi jonimga.

Shu tob birdan jim bo‘ldim,
Urushdim na talashdim,
Qizginamga ko‘ylak deb,
Erim bilan yarashdim.

Qizim ko‘ylagin ko‘rib,
Po‘ng‘illadi o‘g‘lim sal,
"Essizgina, mengayam
Kerak edi poyabzal."

Dedim: "Sabr qil bolam,
Hali boy bo‘b qolamiz,
Yana bir kaltak yesam,
Senga tufli olamiz."

Kutar edim yana bir
Ko‘tarishin qo‘lini,
Axir endi topgandim,
Pul ishlashning yo‘lini.

Aytardim bir kamimni,
Ko‘paytirib to‘rtaga,
Ba’zan gaplariniyam,
Qaytarardim jo‘rtaga.

Urushdan hech darak yo‘q,
Sinmadi qo‘l, belim ham,
Puli ketib insofga,
Kelib qopti erim ham.

Turtimaydi, so‘kmaydi,
Nima jinlar uripti?
O‘g‘lim haliyam eski
Tuflisida yuribdi.

Gulda yo, pulda bo‘lsa,
Ajab, erkak hayoli,
O‘layotib ham "bolam" der,
O‘zbeklarning ayoli.

Marhabo Karimova

@Umr_Falsafasi 🌱