Xush kelibsiz!🇺🇿

Aytgancha, bizni moliyaviy qo'llab-quvvatlagan "El-yurt umidi" jamg'armasiga hamda duogo'y xalqimizga alohida TASHAKKUR!
Men kelajakda albatta ushbu mavzudagi ishlarimni davom ettiraman, balki NOBEL olarman... Lekin kamida PhD qilishim kerak.

Azizlar, yaqinda juda ajoyib xabar olgandim. Shuni bo'lishgim keldi.
Avvalambor, rafiqam Khadicha Utkirovna Suyarovani dunyoning eng nufuzli universitetida olgan muvaffaqiyatli magistr darajasi bilan tabriklayman. Bu eng boshlanishi bo'lsin.
Bilasizmi Buyuk Britaniyadagi ta'lim menga juda ko'p narsani o'rgata oldi. Birinchi navbatda mas'uliyat, o'z-o'ziga ishonch va mustaqil izlanish, fikrlash va Critical Thinking. U yerda o'zligimni topa oldim, o'qishni va izlanishni, ko'proq narsalar o'rganishni hayotim mazmuniga aylantira oldi bu ta'lim. Men O'zbekistonda ham yomon o'qimaganman, "Navoiy" stipendiati bo'ldim, eng yaxshi universitetlardan birida magistraturani tamomladim. Ammo, baribir nimadur kamdek edi. Shuni to'ldirishga yordam berdi Buyuk Britaniyadagi ta'lim. Xullas, bu erkin parvoz - o'z sevgan mavzuyingizda o'qish va izlanish, o'zingizni haqiqiy talabadek his qilish... Nimanidur haqiqiy havas va ishtiyoq bilan qilasiz, kun-u tun o'z mehnatingizni sarflaysiz va natijadan zavq olasiz. Ishonavering bular umuman boshqacha hissiyot.
Xullas, Buyuk Britaniyada baho uchun emas, bilim olish uchun o'qidim. Shunaqangi qiziqdimki sohamga, fanlarga, professorlarning ma'ruzalariga... kutubxonada kechalarni o'tkazishni ham aynan o'sha yerda o'rgandim... hozir ham qumsayman to'g'risi. Imtihonlarni, yoza ish (assignment) larni topshirish uchun yuzlab maqolalar o'qirdim. Bilasizmi men bakalavr vaqtida nima o'qiganman, deyarli yodimda emas, o'zi umuman yodimda ham bo'lmagan. Lekin, Leedsdagi olgan ta'limim hanuz charaqlab turadi hayolimda. Chunki men o'qishni seva oldim u yerda.
Azizlar, dissertatsiya avval ham yozganman (COPY+PASTE), qariyb 19-20 kun vaqt sarflaganman, men o'zimni ham boshqalarni ham aldaganman u dissertatsiya bilan. (birinchi magistr dissertatsiyasini nazarda tutdim. AMMO, bakalavr vaqtida qattiq mehnat qilgandim). Leeds universitetida mavzuning o'zini 3 oy tanladim, oshirib gapirish emas, chamasi 300 dan ziyod ilmiy manbaalarni o'qib chiqqandim (ba'zilarini qarab chiqqanman). Mavzu tanlash juda ham qiyin bo'lgan menga. Axiyri o'zim yoqtirgan kreativlik, hozir dolzarb bo'lgan Sun'iy intellekt va innovatsion menejmentning asosi Jamoalar bilan ishlashga aloqador mavzu tanlashga qaror qilganman. Xullas, mavzuyim "Generativ sun'iy intellekt va Dizayn fikrlash: imkoniyatlar, tahdidlar va samarali integratsiya uchun strategiyalar" (Generative AI and Design Thinking: The Perceived Opportunities, Risks, and Strategies for Effective Integration). Maqsad, Dizayn fikrlash, ya'ni mavjud muammolarga maqsadli yechim topishda Generativ sun'iy intellekt (ChatGPT, Copilot va h.k.) ta'sirini o'rganish, eng qiziqarlisi esa individual shaxs emas, balki jamoa sifatida foydalanganda qanaqa natija bo'ladi, umuman jamoada ham sun'iy intellekt bir xil samara beradimi, qanchalik ishonchli, kreativlikka salbiy ta'sir ko'rsatmaydimi, qaysi jihatlari yaxshi va qaysilari yomon. Mana shunaqa tomonlarini o'rgandim. Ilmiy rahbarim John Palfreyman (IBM da konsultant bo'lib ishlaydi, Professor) sun'iy intellekt va raqamlashtirish sohasida ilg'or tajribaga ega ekspert, mavzuyimni unikalligiga e'tibor qaratdi. Haqiqatdan ham men o'rgangan tomondan hali ilmiy ish qilinmagan. Hatto, xorijda ham. Men natijalar olish, 120 dan ortiq maqola, 20 ga yaqin kitoblarni o'qib chiqdim (bazilarini skim reading qilganman). 5 nafar sohadagi ekspertlar, eng kamida Leeds universiteti professoridan intervyu oldim. Sun'iy intelllektdan yaxshi foydalana oladigan, a'lochi kursdoshlarim ishtirokida eksperimental workshop o'tkazdim, ya'ni Dizayn Thinking Workshopda Generativ AI ishlatishdi. Natija ajoyib, Dissertatsiyam uchun 85 ball oldim (100 balldan 85 bu juda joyib natija). Universitetni esa a'lo bahoga (DISTINCTION, bizda qizil diplom...) tamomlash nasb qildi.
Barchasi uchun avvalo Allohga cheksiz rahmatlar bo'lsin. Duoda bo'lgan ota-onam, ustozlarim, yaqinlarim va albatta doimo qo'llab-quvvatlagan, mavzu tanlayotganimda meni CHALLENGE qilgan, INSPIRE qilgan betakror rafiqam Xadicha Suyarovaga...boringizga shukr, SIz bor ekansiz mendagi shijoat o'lmaydi.

Allohga shukr.  Har bir kishining óz hayot yólidan kelib chiqqan holda muvaffaqiyatlari bóladi. Dunyoning eng zór universitetlaridan biri Edinburg universitetida magsitratura darajasini olish men uchun katta yutuq. Bu universitetda butun insoniyatning buguni va ertasiga ta'sir kórsatadigan ilmiy tadqiqotlar amalga oshiriladi. Jamiyatga va uning kelajagiga hissa qóshadigan, Nobel mukofoti sovrindorlari kabi yuksak maqomlarga erishgan buyuk insonlar, olimlar yetishib chiqqan.  Men shular qatorida Edinburg universitetining bitiruvchisi ekanligimdan juda faxrlanaman. Kelajakda kim va qanday lavozimda bólishimdan qat'iy nazar menda doim "El-yurt umidi" va Edinburg universiteti bitiruvchisi  maqomlariga munosib bólish mas'uliyati bóladi.

Magistratura darajasiga ega bólish qanday his qilinishi kerak bólsa, mening universitetim xuddi shu narsani bera oldi. Ya'ni, xorijda óqish meni inson sifatida yana ham óziga ishongan, óz qarashlariga ega va hayotidan nima hoxlayotganini biladigan mustaqil shaxs sifatida tarbiyaladi.

Meni faqat men ekanligim uchungina yonimda bólgan, yaxshi kunlarimda mendan ham kóproq quvonadigan, qiyinchiliklarimda menga eng kóp qayg'uradigan va har qanday qarorga kelishimdan qat'iy nazar doim meni qóllab quvvatlagan insonlar, ota-onam, sevimli turmush órtog'im va opa-singillarim, yaqinlarim bu yutuq sizlarning ham yutug'ingiz!

Meni "El-yurt umidi" stipendiyasiga munosib deb bilgan jamg'arma va xalqim, Sizlardan cheksiz minnatdorman. Albatta ozmi kópmi, órgangan bilimlarim jamiyatga foydasi tegsagina qalbimdagi bóshliq tóladi.

Mening qadrdon universitetim, bir necha yuzlab kishilar bilimlari asosiga qurilgan darslar va kurslarni tashkil etganing, sohasining eng yetuk mutaxassislarini ózingda jamlab mening ongim, shaxsim va aqlimni rivojlantirishga turtki bólganing uchun rahmat.

Bugun men dunyodagi eng baxtli ota onalarning qizi va eng baxtli turmush órtoqning ayoliman. Shu kunlarga yetkazganingga shukr, Allohim! ✍

(C) Khadicha