#Iltijo
Robbim, Sen beradigan har qanday yaxshilikka muhtojman!

Robbim, ular mendan men xohlamagan narsani talab qilishyapti. Mening nima xohlayotganimni bilguvchi O'zingsan! Fazlu rahmating ila men xohlagan narsani ato etgin!

Allohim, menga Sendan kutayotgan narsam bilan xushxabar ber, axir Sen xushxabar beruvchilarning eng yaxshisisan!

Robbim, yuzimizni davomiy tabassumlar bilan yorishtirgin, qalbimizga hech qachon g'am solmagin!

Robbim, yo'qotgan narsamning evaziga undan sevimliroq narsani bergin!

Allohim, qilgan ozgina solih amallarim tufayli qalb ko'zimni ochgin, meni O'zing rozi bo'ladigan yo'llarga yo'llagin, qalbimni
O'zingga shukr qilishga o'rgatgin!

Rahmating va marhamating darvozalari oldida yosh boladek bo'zlab, umidvor turgan bandalaringni noumid qilma! Sening roziligingdan boshqa tilagimiz yo'q! Gunohlarimiz juda katta, ammo mag'firating gunohlarimizdan ham kattaroqdir!

Allohim, bizga tavfiq bergin, tavfiq esa faqat Sening huzuringdandir. Ishlarimizni oson qilgin, ishlarni osonlashtirish esa Sening lutfingdandir!