Nega o'zbek segmentiga ko'proq musiqa kanallar kerak?Men ko'p o'ylayman nega bizda musiqa rivojlanmay qolgan? Nega bizda musiqiy tanqidchilar mavjud emas, bor bo'lsa ham hech kim ularni bilmaydi va nega xalqimizning 99% qismi musiqaga hech qanday e'tibor berishmaydi? Nega maktablarda musiqa fani darslari rasmiyatchilikdan boshqasi emas?
Sababi bizga aytilmagan musiqa qanday kuchga qodir ekani. Odamlar anglamaydi qandaydir messej yetkazish, kimlarnidir ongsizlik uyqusidan uyg'otish, kimgadir kelajakka umid berish, kimnidir jar yoqasidan saqlab qolish, kimnidir og'ir paytlarida yo'ldosh bo'lishi uchun musiqa eng optimal va eng universal vosita ekanini. Ko'pchilik tasavvur ham qilmaydi musiqa allaqachon tasviriy san'at, adabiyot-u, kino kabi ommaviy madaniyat va san'atning katta qismiga aylanib bo'lishganini. Hamma biladi Sherali Jo'rayev buyuk o'zbek xalq artisti ekanini, hamma habardor "Bolalar" o'z davrida qancha yoshlarni ulg'aytirganini biroq hech kim, hech qaysi platformada ularning san'ati, ularning musiqasi haqida, qo'shiqlarning tuzilishidan tortib bular o'z davri odamlariga qanday ta'sir bergani haqida, qo'shiqlar ortidagi messej va artistning nima sababdan bu qo'shiqlarni yozgani haqida gapirmaydi.
Ommaning musiqiy bilimi sustligi sabab, kontent-meykerlarning ham musiqa nima ekanligini tushuntirishga qo'l urgisi kelmaydi chunki bundan hech qanday naf yo'q. Hamma Ozoda Nursaidova va Hamdam Sobirov eshitib yurganida, kimni ham allaqanday repperning so'kinishlarga to'la qo'shig'ini tahlil qilib, artist bu bilan nima demoqchi ekanini tushuntiradigan video qilishni istardi?
Masalan, YouTube'ning ingliz tilida segmentida bir dunyo kanallar mavjud va barchasi bir-biridan farq qiladi. Kimdir yangi chiqgan albomlariga jonli reaksiya bildiradi, kimdir The Beatles, Led Zeppelin kabi guruhlarning ijodi, madaniyatga ta'siri, musiqani qanday boyitishgani va ular qoldirgan me'ros haqida 1 soatlik dokumentariyalar ishlaydi. Twenty One Pilots va Tyler, The Creator kabi ijodkorlarning muhlislari sevimli artistlarining real hayotlaridagi voqealar, hissiyotlar va kechinmalaridan ilhomlanib o'zlari yaratgan olamlar (lor) dagi albomlarning qanday qilib odamlar hayotiga olib kirayotgan umid, nur, yangi qarashlar va og'irlarini yengil qilayotgani haqida videolar tayyorlashadi, o'sha olamlarni tushuntirishadi. Kimdir Eminem, Nas va Kendrick Lamar kabi repperlarning har bir qo'shig'ida ishlatgan so'z o'yinlari, double entendre va metaforalardan tortib, beat bilan uyg'unlashgan flow va cadence pocket'larigacha bitta-bitta tahlil qiladi. Ularning messejini shunchaki qo'shiqni tinglab ham tushunsangiz bo'ladi biroq aynan geek fanatlar uchun MC lik san'atini ham tushuntiradigan ajoyib kanallar mavjud. Bu soha G'arbda shunchalik rivojlanganki, kontent-meykerlar
Patreon kabi platformalariga ko'chib, o'sha yerda pullik kontent yuklab borishadi. Yana ham men faqat YouTube'ga to'xtaldim, TikTok va Instagram aholisi bo'yicha ma'lumotga ega emasman.
Biz esa doimgidek bu borada ortda qolayotganimiz sabab boshqa platformaga murojaat qilishimiz kerak. YouTube'ga kiritilgan mehnat o'zini qoplaydi deb o'ylamayman. Agarda o'zbek tilida kontent qilsangiz, aholimizning mingdan birini olsangiz bu 40 ming atrofiga to'g'ri kelishi kerak biroq bizda hatto 4 mingta musiqani tushunadiganlar yig'ilgan kanalni bilmayman. Eng maksimal 4 mingta odam uchun yangi YouTube yoki Instagram kanalda video ishlash unga sarflangan mehnatni, montaj va boshqalarni qoplamaydi. Menimcha, shuning uchun ham o'zbek segmentida
telegram kanallar kerak. Yoshlarning barchasi telegram ishlatishadi, bunda yozilgan postlar video kabi ko'p vaqt olmaydi va tekinga bitadi. Kontent-meyker muhimi nimalarni yozishini aniqlab olsa va unga yetarlicha qo'llab-quvvatlash bo'lsa hech bo'lmasa shu telegram orqali musiqaning sehrini ulashish mumkin. Shu sabab, so'rayman, nima haqida yoza olsangiz yozavering, boshida postlar yaxshi chiqmasa ham, hech kim o'qimayotgandek tuyilsa ham yozaverish kerak. Bular ham bir kun mevasini berar-a, nima deysiz?
Ha mayli, shokolatdan olinglar 🍫
@shady_verse
