Maxmudovning Tajribasi

Raqobatdan iste'molchilar foyda ko'radi!

Biror sohada raqobatdan faqat iste'molchilar foyda ko'radi. Keling buni oddiy misol bilan tushuntirib ko'raman. Kino, onlayn TV ko'rishga mo'ljallangan platformalar ko'payishi natijasida foydalanuvchilar sifatli, arzonroq narxlarda turli kontentlar ko'rish imkoniyatiga ega bo'ladi. O'zimdan misol qilsam kechadan oldingi kuni OQ dasturi orqali Elmurod akani "Yengilmen" konsertini ko'rdim (hali YouTube'ga chiqmagan edi). Bunda men platformalar raqobati orqali tekinga yaxshi kontentga ega bo'ldim.

Bunday foydalarni turli mobil aloqa kompaniyalari ochilishi natijasida ular o'rtasidagi "abonent talashishi" sababli e'lon qilayotgan aksiya va chegirmalari; yangi ochilgan bank yoki ularning qandaydir dasturlari chiqishi sababli pul o'tkazmalarini komissiyasiz qilishlari va boshqa sohalarda ko'rishimiz mumkin.

O'qigan insonlarni ko'payishi ham ish beruvchilarga turli "filtrlar" qo'llashiga imkon beryapti. Oldinlari bir yilda 100 kishi o'qishni tamomlab, diplomi bilan ishga kirishga suhbatga borgan bo'lsa, hozirda har yilda minglab talabalar diplom bilan ishga kirish istagida borishmoqda. Shu o'rinda ish beruvchi ham o'ziga kerakli insonlarni tanlash imkoniyati kengaymoqda.

Umuman olib qaraganda raqaobat bor joyda soha rivojlanadi va bozor sifatli mahsulot yoki xizmatlarga ega bo'ladi. Siz biror sohada bo'lsangiz raqobatdan qo'rqmang, sof raqobat sizni kuchayishingizga sababchi bo'ladi.

@Maxmudovning_tajribasi

Onlayn savdoda shoshilmang!

Kecha qayerdandir Samsung Galaxy Fit 3 fitnes soatiga qiziqib qoldim va eng arzon narxda texnomart'dan topdim. Har doim ham texnomart'da bunday arzon narxda narsa topish qiyin deb arzon narxda tezda olish hayolimga keldi, lekin oldin bir taqib ko'rishim kerak degan fikrim sababli buyurtma qilmadim.

Kecha kechqurun Chorsu'dagi do'konlariga borib soatni ko'rsam qo'limga juda kichkina turar ekan va shu sababli menga to'g'ri kelmasligiga amin bo'ldim. Va onlayn savdoda shoshilmaslik kerakligi, kiyim yoki birorta aksesuar haqida gap ketadigan bo'lsa oldin boshqa joydan bo'lsa ham sizga qanday turishi haqida xulosaga kelish kerak degan fikrimni tasdiqladim.

Temu orqali bir qancha mayda narsalar buyurtma qilgan (20-dekabrda) edim, kelsa Xitoydan olgan ilk xaridim haqida ham fikrlarimni yozib qoldiraman.

Oldin aytganimdek biror nimani xarid qilishda yaxshilab izlanib ko'ring, bunda narx, mosligi va sifatlarini taqqoslash imkoniyatingiz mavjudligini unutmang. Kiyim yoki boshqa noyobroq narsani Xitoydan emas, o'zimizda kiyib ko'rib olishni tavsiya qilaman. Chunki men bilishimcha biz bilan Xitoydagi o'lchamlar o'rtasida qandaydir farq bor, aytaylik, bizdagi 44 o'lchamli oyoq kiyim menga to'g'ri kelsa, Xitoyliklarda 44 o'lchamli oyoq kiyim umuman boshqacha bo'lishi mumkin. Yetti o'lchab, bir kesaylik!

@Maxmudovning_tajribasi

Loyiha ochish osonmi?

Agar meni portfoliomni ko'rgan bo'lsangiz "bu bola g'irt bekorchi ekan, bekor qolsa kanal yoki bot ochar ekan" deb o'ylashingiz mumkin. Lekin aslida unday emas, kanal/botlar ochishni 2020-yil boshlagan bo'lsam u paytlari talaba edim (magistraturada), undan keyin loyihalash joyida ishlaganman va hozirda dispetcher bo'lib ishlayapman. Loyihalarni ochishga vaqtdan ko'ra ko'proq qiziqishlarim turtki bo'lgan va har bir loyihani nimadir maqsad sababli ochganman (ko'pincha).

Masalan meni asosiy kanalim Kompyuter Akademiyasini o'qish payti ustoz va kursdoshlarimga oddiy ishlarni "o'ziylar ham qilsaylar bo'ladi" deb ko'p so'raladigan ishlarni videodars shaklida tarqatish uchun ochgan edim; @ExcelDarsBot ni esa Excel dasturi o'lmaydigan dastur, u bo'yicha juda ko'p ilmlar ulashish mumkin va o'zimda bor narsalarni odamlar oson topishsin degan niyatda ochgandim va boshqa loyihalarim ham shunga o'xshash maqsadda bo'lgan. Maqsadi bo'lmagan yoki men kutgan natijani bermaganlari esa yopilgan yoki kimgadir sotilgan.

🤔 Shu o'rinda bir savol tug'ilishi mumkin: o'zi loyiha (telegram kanal, guruh, bot yoki boshqa tarmoqda sahifa) ochish osonmi?
Agar maqsadingiz va qiziqishingiz bo'lsa hamma narsa oson. Mendan ko'pchilik "nima yo'nalishda kanal ochsam bo'ladi" deb so'raydi, men esa ularga nima bo'yicha kanal ochishni o'zing bilmasang ochma deyman. Bu narsani shoirning ilhomi kelmasa ham o'zini majburlab she'r yozishi va bu she'r ajoyib chiqmasligiga o'xshatish mumkin. Kanal yoki boshqa narsani boshlash huddi ijod qilishdek gap, ijodning maqsadi pul va bo'lsa va ma'lum vaqtdan keyin kutilgan pul kelmasa odamni ijod qilgisi kelmaydi.

O'zingizga qiziq bo'lgan narsa (zarar keltirmaydiganlarini aytyapman) da o'zingizni sinab ko'rishga hech ham qo'rqmang. Tushunmagan yoki qo'rqadigan joylaringiz haqida tajribasi borlardan so'rang yoki ularni bloglarini o'qing. O'sha sohaga oid kitoblarni o'qish ham birovlarning tajribasiga ega bo'lishingizga ko'mak beradi. Hech qachon o'zingizni cheklamang, Alloh sizga qaysi jihatlarda iste'dod berganini bilish uchun ham o'zingizni turli ishlarda sinab ko'ring. Balki kanal ochsangiz kelajakda eng katta kanal egalaridan biriga aylanarsiz...

@Maxmudovning_tajribasi

Hamma blog yuritishi kerak

Blog yuritish faqatgina IT'ga aloqasi bor yoki hammaga o'zini "ko'rsatish" istagida bo'lganlar qilishi kerak bo'lgan ish emas, aslida hamma blog yuritishi kerak. Buni tushuntirish uchun bitta oddiy misol keltiraman:

Men hovlimga chiqsam uzumlarimga qandaydir kasallik tekkani sababli mevalari bujmayib qolgan, muammoga yechim izlash uchun YouTube'ga kirsam va uzum hosilini kasallikdan asrash deb izlasam hech nima chiqmadi, Google'dan ham tayinli javob chiqmadi. Hamma joy IT ga oid video va maqolalar bilan to'lib yotibdi. Endi bu yil uzum yeyolmaydigan bo'ldim va bunga bog'bonlarning blog yoki kanal yuritmasligini sabab qilib aytishim mumkin )

Blog yoki kanalni istalgan soha vakili o'zida mavjud bilimlarni boshqalarga ulashish uchun yuritishi kerak, siz buxgalter bo'lsangiz hisob-kitoblar haqida yozing, biznesmen bo'lsangiz odamlarni biznes bo'yicha bilimlarini oshiring, oshpaz bo'lsangiz bizlarga o'xshaganlarga osh qilishni o'rgating va h.k.

Qadimda insonlar o'z ilmini ulashish uchun turli kitoblar yozishgan, hozirda yaxshi kanal yoki blog yuritishni ham kitob yozishga o'xshatish mumkin. Kitobdan farqlisi kanal/blog yuritishda talablar katta emas, ijodkorlikka ruhsat beriladi.

🤔Blog va kanalni o'zaro farqi qanday?
• Kanalda biror mavzu bo'yicha mavjud ilmlarni ustoz sifatida ulashasiz: @kompyuter_akademiyasi
• Blog biror yoki bir nechta sohalar bo'yicha fikrlaringizni ulashasiz: @Maxmudovning_tajribasi

✅ Blog/kanal yuritishni boshlashda ko'pchilikni qiynaydigan jihatlar:
• Maqola yoki video tayyorlashni bilmayman -> Sekin boshlayvering, o'rganib ketasiz. Men ham maqola yozishni bilmayman, lekin nechtalab kanallar yuritaman. Nasib qilsa yildan yilga yozishim yaxshilanyapti degan umiddaman;

• Men o'z sohamda juda kuchli emasman -> Aytaylik siz sohangizni 2 bahoga bilsangiz sizni sohangizga hali kirmagan yoki 1 bahoga biladiganlar borligini unutmang, ularni ilmingizni ulashish orqali ular sohani 2 bahoga biladigan, siz esa ularga maqola yoki video tayyorlash davomida sohangizni 3 bahoga biladigan bo'lib borasiz. Obunachilaringiz bilan birgalikda o'sasiz (o'zimda shunday bo'lyapti);

• Kanal/blogimni ommalashtirishni bilmayman -> Mayli sizni minglab odam kuzatmasin, lekin siz 200-300 kishiga bo'lsa ham ilm ulashyapsiz, ularni hayotini yaxshilanishiga hissa qo'shyapsiz. Alloh nasib qilsa ishingizdan manfaat oluvchilar ko'payib ketadi (Kompyuter Akademiyasi kanalimda shunday bo'lgandi, boshida faqat kursdoshlarimga foydasi tegadi deb ochgandim);

Blog/kanal yuritish sizni yanada ko'proq izlanish va mehnat qilishingizga undaydi va sizni kuzatayotganlar sababli sizga "meni shuncha odamlar kutyapti, hozir kino ko'rgandan ko'ra birorta maqola yoki video tayyorlay" degan turtki beradi. Bu narsa esa sizni "yoqimli" konfort zonasidan chiqishingiz ko'maklashadi.
“Kim ilm yo‘lini tutsa, Alloh uni jannat yo‘liga yo‘llab qo‘yadi. Albatta farishtalar ilm talabidagi kishiga rozi bo‘lgan hollarida qanotlarini yozib turadilar”

✍️ Blog/kanal yuritish bo'yicha nasib qilsa hali ko'p yozaman, agar bu borada sizga biror ko'mak yoki maslahat kerak bo'lsa @wmteam95 doimo tayyor!

@Maxmudovning_tajribasi

Yil sarhisobi va 2025-yil uchun rejalar

Bu yil davomida juda koʻp imkoniyatlarni qoʻldan chiqardim, bunga asosiy sabab aniq maqsad yoʻqligi va dangasalik deyishim mumkin. Lekin shunday boʻlsa-da Allohning marhamati bilan bir qancha sezilarli ishlar amalga oshdi:
• Asosiy ishim boʻyicha texnik boʻlimdan dispetcherlikka oʻtdim;
• Yil oxirida arab tilini oʻrganishni boshladim, nasib qilsa bu yil toʻliq tugatib ulugʻ kitobimizni oʻqishni boshlaymiz;
• Ancha yildan beri oʻylab yurgan Kompyuter Savodxonligi kursini tayyorlab, sotuvga chiqardik. Alhamdulillah koʻpchilikka foydasi tegyapti degan umiddamiz;
• May oyidan 1Fit abonenti boʻlib suzish va zalga borishni odat qildik. Hozirgi holatimdan ancha mamnunman, arzimas narsalarga kasal boʻlish ham yoʻqoldi;
• Tajribalarimni ulashish uchun shu blogni ochdik.

😎 2025-yil uchun rejalar:
• Mohirdev dan Python va sunʼiy intellekt boʻyicha bir qancha kurslar olganman, shularni hammasini tugatib birorta loyihalar tayyorlash;
• Python'ni tugatib oʻzimni blogimni 0 dan tayyorlash va barcha loyihalarimni unga birlashtirish;
• Katta YouTube kanal ochish va kamida yil oxirigacha 40-50k obunachi toʻplash. Kontent boʻyicha aniq reja yoʻq, uni ham tayyorlab chiqamiz.
• Boshqa loyihalarni ham bir muncha jonlantirishimiz kerak.
• Yangi YouTube kanal asosida bir qancha dasturlar (blender, Photoshop, AE va b.) bilan ishlashni ham birgalikda oʻrganamiz, inshaalloh.

Siz ham aniq reja tuzing. Uni bir qancha qismlarga ajrating va aniq deadline asosida harakat qiling. Harakat qilishda motivatsiya emas, intizom koʻp foydaliroq ekanligini unutmaylik.

@Maxmudovning_tajribasi

Dasturlash yoqmasa No-code'ni o'rganing

U bu joyda zo'r dastur yoki saytlarni ko'ramiz yoki biror ishimizni namoyish qilish (masalan, dashboard) da osonroq yechim qidiramiz va shunda o'zimizga aytamiz: "Qani edi dasturchi bo'lsam shuni shunday qilib qo'yardim". Bunday holatda dasturlashni o'rganishni bizni hamma muammolarimizga yechim bo'ladigandek tuyuladi. Umuman olib qaraganda dasturlashning maqsadi ham biror muammo yechim berish, menimcha. Lekin siz dasturchi bo'lolmasangizchi? Unda orzular armonga ayalanadimi? Yo'q buning ham yechimi bor 😉.

Dasturlashda qilish mumkin bo'lgan ishlarni kamroq kod ishlatib ham yasash mumkin, unday platformalarni low-code deyishadi, umuman biror dasturlash tilinining kodlarini ishlatmasdan dastur yasaydigan platformalarni esa no-code platformalar deyishadi. Low-code'dan foydalanish uchun qaysidir dasturlash tilini oz bo'lsada bilishingiz kerak, no-code'da esa hech nimani bilish talab qilinmaydi.

No-code sohasiga kirishni AppSheet platformasidan boshlashni tavsiya qilaman. Uni tushunish uchun Excel yoki Sheets'ni bilish ni o'zi yetarli. Namuna sifatida o'zim yasagan dasturni ko'rsatishim mumkin. Mening dasturim haqida tushuncha beradigan bo'lsam, kiritilgan va ishlatiladigan ma'lumotlarga baza sifatida Google Sheets ishlatilgan, AppSheet orqali esa foydalanuvchi tomoni qulay holatga keltirilgan. Umuman olib qaraganda bu platformani o'zida anchagina ishlarni qilsa bo'ladi. Nasib qilsa, yangi YouTube kanalimda AppSheet haqida hamma bilganlarimni ulashib boraman.

Xulosa qiladigan bo'lsak, ilojsiz narsani o'zi yo'q. Siz qaysidir ishni amalga oshirishni istasangiz yoki biror vazifangizni osonlashtirishni istasangiz turli konstruktor saytlar, sun'iy intellektlar orqali ham yetarlicha natijaga erishishingiz mumkin. Faqat ishingizni osonlashtirish uchun kamida ingliz tilini va SI saytlar (ChatGPT'ni o'zi yetarli) dan foydalanishni bilsangiz va izlansangiz yetarli.

@Maxmudovning_tajribasi

Qaysi tilni o'rganay: rus yoki ingliz tili?

Faqat o'zbek tilini bilish orqali biror yangi narsani o'rganish juda qiyinligini bilamiz, bunga asosiy sabab esa o'zbek tilidagi manbalarni kamligi va o'zbek tilida dunyo bo'yicha kamchilik muloqot qilishi hisoblanadi. Rivojlanishni istagan inson o'zining ona tilidan tashqari yana bir yoki bir nechta xorijiy tillarni o'rganishi ham kerak bo'ladi. Hozirda ommalashgan xorijiy tillardan eng mashhurlari rus va ingliz tillaridir. Xorijiy tillarni endi o'rganishni boshlayotganlarda esa "qaysi birini o'rganay" degan savol doimo qiynashadi.

✅ Endi xorijiy tillarni o'rganishni boshlash arafasi bo'lganlarga rus va ingliz tilini biluvchi inson sifatida tajribalarimni ulashmoqchiman.

📄 O'zi rus va ingliz tilini birgalikda bilganingiz juda yaxshi, lekin har ikkovini birgalikda o'rganishni iloji bo'lmasa ingliz tilini o'rganish bilan cheklanishni tavsiya qilaman. Bunga bir qancha sabablarni keltirishim ham mumkin:
1. Rus tiliga nisbatan ingliz tilida ma'lumotlar ko'proq, rus tilida bor narsa albatta ingliz tilida ham mavjud. Lekin aksi bo'lmasligi mumkin.
2. Ingliz tilini o'rganish rus tilidan ko'ra oson, ham desa maktab paytlaridan beri ingliz tili yaxshiroq o'rgatilgani sababli keyinchalik ingliz tilini o'rganish ham unchalik muammo bo'lmaydi.
3. "Ishlasang rus tili kerak bo'ladi" degan gaplar yaqin yillarda aktual bo'lmay qoladi, chunki rus tilini biladigan avlod o'rniga asosiy qismi ingliz tilini biladiganlar kelyapti.

Odamzotni hamma ilmni o'rganishga imkoniyati yetmasligi aniq, lekin keraklisini aniqlab olib, unga ko'proq fokusi (e'tibori) ni qaratishi orqali kerakli maqsadga erishishi mumkin.

@Maxmudovning_tajribasi

Obunali loyihalar ko'paymoqda

💰 Obunali loyiha - har oy qandaydir to'lov evaziga tekin ulashilmaydigan kontentlarga ega bo'lish imkoniyatini taqdim etuvchi loyihalar. Bunday loyihalarni asosan xorijiy YouTuber'larda turli servislar (patreon va b.) asosida tashkil etishadi. Bunda arzimas to'lov (5-10$) evaziga ham ma'lum qadar qimmatli ma'lumotlarga ham muallifni qo'llab-quvvatlash imkoniyatiga ega bo'lasiz.

✅ Bugungi postda o'zbek segmentida mavjud, o'zim bilgan shunday loyihalar haqida yozaman. Ularni hammasida o'zim ishtirok etganim sababli beradigan ma'lumotim tajribaga asoslangan bo'ladi.

• Bek Olimjon'ning Bek Olimjon Academy loyihasida asosan ko'z shifokorlari uchun maxsus darslar bilan bir qatorda dunyoqarashni kengaytirishga bag'ishlangan maqolalar ham berib borilar edi, to'lovi $10/oy. Loyihada bir oy qatnashdim, loyiha yomon emas lekin meni o'ylashimcha ko'z shifokorlari uchun yanada foydaliroq bo'ladi.

• Aziz Rahimov'ning Parallel Muhit loyihasida hozirda qatnashyapman. Unda va'da qilinishicha parallel olam (ya'ni internetda) rivojlanish uchun kontentlar, harakatchan insonlar bilan guruhda muloqot qilish amalga oshiriladi. Hozircha loyihani yaxshi yoki yomon deyolmayman, 1 oydan keyin fikrimni aytishim mumkin. Uning oylik to'lovi 67 ming so'm.

• Abdusattor'ning Maqsad Club loyihasiga 88 ming/oy to'lov qilasiz va shaxsiy rivojlanish hamda shunga o'xshash sohalarda turli tavsiyalar berilardi, adashmasam. Oldin bir a'zo bo'lgandim, keyin yoqmaganligi sababli pulimni qaytib olib, chiqib ketgandim. Yaqin orada yana qo'shilib ko'rish niyatim bor, balki ancha yaxshilangandir...

• Mikhail Volinkin'ni ko'chilik "качок" deb taniydi, aslida u kishi bodibilding bo'yicha bir qancha yutuqlarga erishgan chempionlardan hisoblanadi. Ularning Volinkin Team loyihasiga a'zo bo'lish uchun bir martalik 200 ming so'm to'laysiz va https://volinkin.uz/ dagi barcha ma'lumotlarga kirishga ruhsat olasiz. Ma'lumotlar ichida mashqlarni video ko'rinishi, dieta va boshqa foydali narsalar berilgan.

🌶 Achchiq haqiqat: Akademikni loyihasida ishtirok etsangiz ham lekin o'zingizda harakat bo'lmasa hammasi befoyda. Istalgan rivojlantirishga asoslangan loyihaning maqsadi faqatgina turtki berishdi. Siz harakatga kelmasangiz hammasi bir 🪙.

@Maxmudovning_tajribasi

Hamma o'z ishini qilsa rivojlanish bo'ladi!

Maktabning iqtisod kitoblarida hammani o'z sohasi bo'yicha ixtisoslashishini ish samaradorligiga ijobiy ta'siri haqida ma'lumotlar ko'p berilgan edi (maktab paytlari iqtisoddan olimpiadaga borganim sababli kitoblarini yodlaganman va haligacha ko'p joylari yodimda). Unda aytilishi bo'yicha hamma o'z ishini qilishi ish samaradorligini oshishiga sababchi bo'ladi. Keling bu narsani kanal yuritish yoki video kontent yozuvchi o'zimni misolimda tushuntirib bersam.

📄 Istalgan loyihamga biror ma'lumot yoki video yozishim uchun quyidagi ishlar bajariladi:
- Video yoki maqola uchun g'oya topish;
- G'oyani o'z uslubimga moslab senariy yozish;
- Ssenariy asosida videoni yozish;
- Yozilgan video uchun obloshka (videoni yuzasi) ni yasash (hech bo'lmaganda canva.com'da);
- Yozilgan videoni montaj qilish;
- Tayyor videoni ijtimoiy tarmoqlarga yuklash.

Endi bu amallarni men va men kabi ustozlar qanday bajarishini aytadigan bo'lsam hammasini o'zimiz qilamiz. Bu esa noto'g'ri hisoblanadi. Chunki men ishtirok etishim shart bo'lmagan va boshqa inson qilsa ham bo'ladigan ishlarni boshqalarga topshirganim yaxshiroq (masalan, videoga obloshka yasash, videoni montaj qilish va e'lon qilishni). Hamma ishni bir o'zim qilganim uchun ko'p videodarslar chiqarishga ham toqat, ham kuch yetmaydi. Balki shu sababli ham juda ko'p sohalar bizda rivojlanmaydi (hamma yuklama bir yoki bir necha insonlarga taqsimlanadi).

Xorijiy mamlakatlarida hamma ishni o'z egasi amalga oshiradi, oddiygina bizdagi "отделкадр" lavozimini xorijiy firmalarda bir qancha xodimlar "taqsimlab" olishgan (rekruter, HR, office menejer va h.k). Meni misolimdagi ishlarni ham jamoa bilan amalga oshirishadi va hammaga yuklama teng taqsimlangani uchun kimdir charchab qolmaydi. Bundan tashqari bir inson bir ishga fokusini qaratgani va ko'p marotaba takrorlagani sababli o'sha ishda "zo'ri" ga aylanadi.

Yaqinda @ks_kursi ni yozishda hamma ishni qilishga charchadim va bildim-ki hamma ishni o'zim qilishda davom etsam kursni ancha vaqtdan keyin e'lon qilishimga to'g'ri kelardi. Shu sababli bir ukamizdan har bitta videolarni montaji bilan shug'ullanishini kelishib oldik, buning natijasida men tinmay videolarni olib unga tashlab qo'yaveraman u esa montajni qilib tayyor darsni menga tashlab beradi. Mana shu kichik ish taqsimoti ham meni samaradorligimga sezilarli ijobiy ta'sir qildi.

Ongimizga singib ketgan "hamma ishni o'zim qilaveraman" degan tushunchadan kechishimiz kerak. Mayli, biror ishni boshqa kishi qilishi orqali biroz harajatga tushsak ham, lekin ancha yuklamadan halos bo'lamiz va biz sababli kimningdir "qozoni qaynashi" mumkin bo'ladi. Agar katta harajat qilolmayman desangiz siz bermoqchi bo'lgan vazifani endi o'rganayotganlarga bering, sifatli natija bo'lmasa ham arzonroq bo'ladi va yoshlarning ham o'sishiga ko'mak bergan bo'lasiz.

@Maxmudovning_tajribasi

Ko'proq izlanishni foydasi

Anchadan beri HyperX Quadcast'ni olish niyatida yurganim sababli faqatgina 2 ta onlayn do'konga chegirma bo'lib qolmadimi deb qarab turar edim, Malikaga borganda qiziqishdan do'kondagi narxlarni ham so'rab qo'yardim, lekin boshqa onlayn do'konlarni ham bir qarab qo'yish hayolimga kelmagan ekan.

Yaqindagina hamkasbimga olmoqchi bo'lgan mikrofonim haqida aytgan edim, u kattabozor.uz saytidan men 1.7 mln ga olmoqchi bo'lgan mikrofonni 1.1 mln ga Radius do'konida borligini topib berdi. Do'kon bilan gaplashdim, haqiqatdan ham bor ekan va kecha 1.1 mln ga olib qaytdim.

Biror nima xarid qilish yoki o'rganish istagida bo'lsangiz menga o'xshab "qotib qolmang", balki bo'lib qolishi mumkin deb bir qancha manbaalardan izlanib ko'ravering. Balki nasib qilib siz istagan narsadanda yaxshiroq narsani toparsiz. Bizdan harakat Allohdan barokat!

@Maxmudovning_tajribasi

Men tavsiya qiladigan kinolar

Oxirgi paytlarda sabr bilan bitta kinoni to'liq ko'rishim qiyin bo'lib qoldi, bunga sabab meni ushlab turadigan kinolarni topolmasligim deb o'ylayman. Lekin ilgari juda ko'p kino ko'rardim va ularni yaxshilari haqida kanalimda ham dam olish kunlari aytib o'tardim.

✅ Bugun sizlarga esimda qolgan bir qancha kinolar haqida aytib beraman:
• Qalbaki soxta o'yin (The Imitation Game) - urush davrida raqiblarni xabarlarini aniqlash maqsadida mashina yaratishadi, ana shu mashina hozirgi kompyuterlarning "bobo"si hisoblanadi.
• Toklar urushi - fizikani bilsangiz bu kino juda qiziq bo'ladi, bilmasangiz ham qiziq kino. Kinoda bir vaqtda yashagan bir qancha olimlarning faoliyati haqida gap ketadi, ular fizikani elektr qismida tanishgan Tesla, Edison va boshqalarni faoliyati haqida.
• Super 30 - bu kinoni birinchi ko'rganimda o'zimizni Buxoroda mavjud "Qorako'l o'qitish tizimi" hayolimga kelgandi. Ushbu hind kinosida ham 30 ta turli qishloqlarda yashovchi bolalarni yig'ib o'qishga tayyorlaydi.
• Imtihon o'yinlari - adashmasam koreya filmi, imtihonlarda turli "g'irrom" o'yinlarni amalga oshiruvchilar haqida qiziq kino.
• Tafakkur o'yinlari (2019) - kino qahramoni ingliz tilining birinchi lug'atini tayyorlash istagida bir qamoqdagi yoki kasalxonadagi inson bilan ishlaydi. Kino orqali siz lug'atlar qanday yaratilishini bilishingiz mumkin. Menga eng yoqqan kinolardan biri shu hisoblanadi.
• Stiven Hoking koinoti - Stiven Hoking hayoti haqida hikoya qiluvchi kino, ancha mazmunga ega.
• Shamolni bo'ysundirgan bola - bir qishloq yigiti hosillarini qurg'oqchilikdan saqlash uchun shamol elektr stansiyasini otasini velosipedidan yasaydi. Ajoyib kinolardan biri.
• Lyusi - "insonni miyasi 100% ishlasa nima bo'ladi" degan savolga nazariy javobni sodda tilda shu kinodan olishingiz mumkin.
• Interstellar - batafsil tavsiloti aniq esimda yo'q, lekin yaxshi kino edi (hozirda inglizchasini ko'rish niyatim bor).
Bundan tashqari yana bir qancha kinolarni tavsiya qilishim mumkin, lekin ular siz va meni istaklarimizdagi farq tufayli sizga yoqmasligi mumkin.

Kino tanlashda ham sizga foydasi tegadigan kinoni tanlashga harakat qiling, buning uchun kinoni janri va nima haqida ekanligini o'qing, turli reytinglardagi o'rniga ahamiyat bering. Agar til o'rganayotgan bo'lsangiz qiziq kinolarni o'rganayotgan tilingizda ko'ring. Sizga biroz yoqmagan kinoni oxirigacha ko'rib qo'yaveray deb vaqtingizni ketkazmang, ketadigan vaqtni foydali biror nimaga ishlatganingiz yaxshi. Sara kinoni ko'ring, "Xo'rlangan admin" kabi past saviyali kinolar deb noyob vaqtingizni uvol qilmang.

⬇️ Yuqorida eslangan hamma kinolarga berilgan havola 2025-yilga qadar ishlaydi, undan keyin o'zingizga yoqqan kinoni boshqa manzillardan topasiz. Kinolarning barchasi o'zbek tilida.

@Maxmudovning_tajribasi

Kino koʻrish uchun platforma topdim

Hammasi yandex premium'ni olganimdan soʻng boshlandi. Premium taksida yurganda bonuslar, yandex music, kinopoiskdan foydalanish va yandex knigaga kirish imkonlarini vaʼda qildi, men esa olib bekor qildim. Chunki taksida kamdan-kam yuraman, qoʻshiqlarni kam eshitaman (eshitsam ham Youtube'ni oʻzidan eshitaman), kinolarni asosan mana shu saytdan yuklab koʻraman, kitoblarni esa asosan oʻzbekcha oʻqiyman (hilol ebook, asaxiy books).

Mayli sotib olib boʻldim, hech boʻlmasa yangi yoki yaxshi kinolarni koʻray desam tayinli narsa kinopoiskdan chiqmadi. Shundan soʻng koʻp kino koʻradigan hamkasbimdan qaysi platformalarda kino koʻrasiz deb soʻradim. U bir nechtasini aytdi, men esa ulardan tanlashim uchun quyidagi jihatlariga eʼtibor berdim. (Oʻzi "qaroqchi saytlar"dan yuklab olib koʻrishda davom etsam boʻlardi, lekin bu odatimni yoʻqotishga kirishishim kerakligi uchun ham platforma izlashga kirishdim.)

• Iloji boʻlsa kinolarni ingliz tilida ham koʻrish imkoni boʻlsin, bu kino koʻrish davomida ingliz tilimni yaxshilashga yordam beradi;
• Obuna narxi unchalik qimmat boʻlmasin, chunki onda sonda kino koʻradigan odam uchu n oyiga 50-60 ming toʻlash koʻplik qiladi.
• Yangi kinolar tez joylanishi, filtr, turli reytinglar boʻlishi kerak edi.

TVCOM'ni tekshirish davomida Venom 3 va Joker'ni yangi kinolarini topdim, ingliz tilida ham bor ekan va eng asosiysi ikkala kinoni ham obuna sotib olmay turib koʻrish mumkin ekan. Hozircha shu platformani tanladim, istasangiz siz ham shu platformani tanlang:

📲 TVCOM Android dasturi

Biror pullik servisdan foydalanisha qaror qabul qilishda shoshilmang, "2 soatda chegirma tugaydi", "faqat siz uchun chegirmalarimiz bor" kabi marketing hiylalarga uchmang. Istak va imkoniyatlaringizdan kelib chiqib qaror qabul qiling.

@Maxmudovning_tajribasi

Men ham shunday qilaman 🤨

Maymun biznesi degan narsa haqida eshitgan bo'lsangiz kerak, bu narsani ma'nosi nimani bozori chaqqonlashsa hamma o'zini o'shanga urishidir (balki boshqachadir). Aytaylik, bu yil piyoz qimmat bo'lsa keyingi yil hamma piyoz ekishga o'zini urishi desak, internetda buni turli metod va loyihalar asosida ko'rishimiz mumkin. Oxirgi paytlar "izohda + qoldiring, men esa sizga bir narsani jo'nataman" degan narsa trendga chiqyapti, bu narsani hamma qo'llayapti. Menga esa bu yoqmaydi...

Sababini aytadigan bo'lsam hammani o'z uslubi bo'lishi kerak, aytaylik obunachilarni loyiha yoki videoga jalb qilishni "izohda + qoldiring" deyishdan boshqa usullari ham bo'lsa kerak. Lekin biz bir kishi qilgan va o'xshagan narsaga yopishib olamiz, boshqacharoq yechimlar izlashga erinamiz va buning natijasida UzNET (o'zbek tilidagi internet) da kreativlik yo'qolmoqda. Bu esa foydalanuvchilar uchun zerikarli hisoblanadi, qo'pol qilib aytsak, bozorda tayin mahsulot yo'qligi sababli xaridorlar borini oladi va natijada "отравления" bo'ladi.

Sizga tavsiyam: Instagram, TikTok va YouTube'ning Shorts'laridan voz keching. Ilm olish uchun ularni ishlataman deb o'zingizni aldamang. Ilmni YouTube va Telegram yoki saytlardan olishni o'zi ham yetarli hisoblanadi. Birinchi aytgan tarmoqlarim asosan ko'ngilxushlik uchun yaratilgan tarmoqlar hisoblanadi. Ishonmasangiz "izohda + qoldiring va men sizga aniq faktlarni keyinroq e'lon qilaman" 😂.

@Maxmudovning_tajribasi

Shunda ham yetmayapti...

Ilgari 50 MB ni bir oyga yetkazar edik, hozir 50 GB ham bir oyga yetmayapti. Vaholanki olamshumul ishlarni qilmayapmiz...

Oldinlari 1 litrlik kolani 2-3 kishi ichar edik, hozir 2.5 litrlikni bir o'zimiz ichyapmiz. Vaholanki oshqozonimiz yillar davomida kattargani yo'q.

Bu yerda asosiy masala bizning ehtiyojlarimizni tarkibiga keraksiz narsalarni ko'proq kirganidir. Aytaylik 50 GB'ni bir oyda ishlatadigan inson shuncha trafikni qayerga ketayotganini tahlil qilsa katta qismi uncha zarur bo'lmagan narsalarga ketayotganini anglashi mumkin. Ovqatlanishda ham shunday, o'zi qornimiz to'yishi uchun ko'p narsa kerak emas, lekin ko'zimiz to'yishi uchun ancha narsalar ham yetmasligi mumkin.

Iste'mol qilayotgan narsalarimizga e'tiborli bo'laylik, aslida bizga ko'p narsa kerak emas. Minimal imkoniyatlardan maksimal foydalanish orqali ham yetarli natijaga erishishimiz mumkin.

@Maxmudovning_tajribasi

O'chirib qutulasiz!

Tabiatdan juda qiziquvchan insonman. Bir narsaga qiziqsam yoki oxirigacha boraman, yoki ma'lum vaqtdan so'ng zerikib u narsani tashlab ketaman. Bu odat ko'pincha zararimga ishlaydi, masalan, kompyuter o'yinlariga qiziqsam oxiriga yetmaguncha "nazoratni yo'qotaman".

Ko'pchilik aytishi mumkin "me'yor bilan o'ynasa bo'ladiku" deb, lekin qiziquvchan inson uchun ba'zan o'zini nazorat qilish qiyin bo'ladi (ishonmasangiz o'zingiz kunda qancha vaqtni reels, shorts ko'ringa ishlatishingizni tahlil qilib ko'ring). Bunday insonlar uchun voz kechish eng to'g'ri tanlovdir. O'yinlarga kirishim ketdimmi, demak hammasini o'chirib qutulaman!

Siz ham qandaydir keraksiz narsaga o'rganib qolgan bo'lsangiz o'chirib qutuling. Vaqtida instagram, YouTube va TikTok'ni o'chirib ham ancha vaqt "tinch" yashagan edim. Siz ham ulardan qutulib ko'ring, ko'rasiz hayotingiz faqatgina yaxshilanadi.

@Maxmudovning_tajribasi