Kompas guruhining maqsadi va vazifalari haqida eshitib juda xursand bo’ldim. Chunki, o'zim hujjat topshirish va o’qish jarayonlarida duch kelgan muammolar, mendagi jarayonlarni qandaydir muddatga kechikishiga sabab bo’lgan edi. Yuzaga kelishi mumkin bo'lgan muammolar haqida oldindan bilish va unga tayyorlanib borishda - Kompas klubida bo’ladigan seminar va treyninglarning ahamiyatini juda katta. Klubdan olinishi mumkin bo’lgan natijalar haqida quyida sanab o’tmoqchiman:

- Sizga xorijiy oliy ta’lim dargohini tanlashda ma'lum darajada filtr vazifasini bajaradi. Ya’ni, berilgan tavsiyalar asosida qanday oliygohlarga o’z fokusingizni qaratish haqida bilib olasiz.

- Hujjat topshirish jarayonida va xususan hujjatlar ichida qanday ko’p kuzatiluvchi xatoliklar bo’lishini bilgan holda, tayyorlayotgan hujjatlarga e’tiborli bo’lishni o’rganasiz.

- Xorijiy davlatlarda o’qigan va ishlagan, shuningdek hozirda u yerda bo’lib turganlar bilan bog’lanish orqali tavsiyalar olish va siz duch kelayotgan muammolarni yechimini topishda yordam olish imkoniyatiga ega bo'lasiz.

- O’zingizga o’xshagan talabalar va kelajagiga befarq bo’lmagan yoshlar bilan muloqotda bo’lish orqali fikrlash darajangizni kengaytirish va ilmiy bahslar qilish imkoniyatingiz bo'ladi.

- Xorijiy oliy ta’lim muassasalarida sizni kutib turgan muhitga moslashish va u yerda o’rgatiladigan dasturlar, innovatsion o’qitish tizimlari, zamonaviy IT texnologiyalari haqida dastlabki fundamental bilimlarga ega bo’lasiz.

Bularnimg barchasi siz uchun oddiy narsalardek tuyulishi mumkin, lekin qisqa umrimizda erishishimiz mumkin bo'lgan marralarni zabt etish vaqtini anchagina kamaytirishi mumkinligiga ishonaman.

Ha aytgancha, jamoadagi muhit va ko'zi chaqnab turgan yoshlarni ko'rib geologiya sohasida shunday kadrlar yetishayotganidan juda mag'rurlanib ketdim, to'g'risi.

"Kompas" jamoasiga va ayniqsa Boqijonov Shohruh akaga klub rivojlanishi uchun va seminarlar tashkillashtirish uchun ko'rsatayotgan jonbozligi uchun rahmat aytib qolaman.

Barchangizni seminarda ko'rganimdan xursandman.