Bugun ko'rishaylik,
Yomg'irni qara!
Suvga bo'kkan mushukday shahar.
Osmon yaylovlari bulutga qaram,
Ko'ngil - tashrifinga,
Yo'q dema faqat.
Bugun ko'rishaylik,
Hiyobonni qo'y,
Soyabon ko'tarib yurush ham mahol.
Yo'qsil peshonamda g'aribgina uy,
Unga ikki olam sig'ar bemalol.
Hislar chiqsin, mayli quyushqondan,
Xo'mray taqiqlarga,
Yelib kel gulum.
Sen qahva ichasan oyna yonida,
Men unsiz chekaman,
senga termulib.
Bugun ko'rishaylik, ikkilanma hech,
Urunma boshqa kun fursat topishga.
Piyoda yo'lga tush - avtolar sotqin.
Nozik badaninga chippa yopishgan
jiqqa ho'l libosda ko'zimga botgin.
Dovdirab eshikka suyanib qolay,
Yomg'irda ivigan qaro sochlaring uchidan chikkilab tomgancha sharbat dildirab uyga kir,
Dod, iforingdan,
Shilq etib yiqilay,
Sarhush sarmast.
Kel hozir ko'ksimning ichi to'la ganj,
Yor, uni yor! Uni
Yorug' nurdanam.
Kechiksang befoyda, yomg'ir to'xtagach,
Aylanib qolaman sovuq murdaga.
Bugun ko'rishaylik
Yo'q dema faqat...
(c) Jontemir
