Botir Zaripov

#qishga_zaxira

Shahar-tumanlar hokimlari, ularning birinchi o‘rinbosarlari, hududlardagi dehqon bozorlari rahbarlari Buxoroda aholiga qishloq xo‘jaligi mahsulotlarini arzon narxlarda yetkazib beruvchi “Buxoro qishloq xo‘jaligi mahsulotlarini ulgurji sotish bozori” MCHJda bo‘lib, zaxiraga jamg‘arilgan mahsulotlar va mahsulotlarni saqlash texnologiyasi bilan tanishishdi.

Muloqot avvalida viloyat hokimi Botir Zaripov oziq-ovqat mahsulotlari zaxirasini yaratishda aholi soni bilan bir qatorda chet elga qatnab ishlayotgan mehnat migrantlari, hududda istiqomat qilayotgan kam ta’minlangan, ijtimoiy muhofazaga muhtoj oilalar, ayniqsa, mahallalar “Temir daftari”ga kiritilgan fuqarolar manfaatlari va turmush sharoitidan kelib chiqish, shu boisdan mahalla va qishloqlarda arzonlashtirilgan narxlarda oziq-ovqat yarmarkalarini muntazam tashkillashtirish, nochor va og‘ir ahvolga tushib qolgan oilalar holidan xabar olish zarurligini alohida ta’kidladi.

Ichki imkoniyatlardan kelib chiqqan holda viloyatimizda ba’zi mahsulotlar, jumladan, un zaxirasini yaratishda “Buxorodonmahsulotlari”, “Qorako‘ldonmahsulotlari”, “Kogondonmahsulotlari” aksiyadorlik jamiyatlari bilan birga, o‘z yorlig‘iga ega bo‘lgan bug‘doyni qayta ishlashga ixtisoslashtirilgan korxonalar imkoniyatlaridan samarali foydalanish lozimligi qayd etildi. Muhokamada xuddi shunday, oziq-ovqat mahsulotlari yetishtiruvchi tadbirkorlik sub’yektlarini tijorat banklarining imtiyozli kredit mablag‘i va subsidiyalari bilan qo‘llab-quvvatlash zarurligiga e’tibor qaratildi. Markaziy bank viloyat bosh boshqarmasining bu boradagi imkoniyati o‘rganildi.

Zaxira qilinadigan har bir mahsulot ta’minoti yuzasidan tegishli tashkilot, idora va korxonalar mutasaddilari shaxsiy mas’ul sifatida biriktirilib, o‘z navbatida tizimli kuzatuv va nazorat ishlarini olib borish lozimligi uqtirildi. Shuningdek, shahar va tumanlarda faoliyat yuritayotgan markaziy dehqon bozorlarida, qolaversa, yirik savdo majmualarida mahsulotlarni yetarli darajada jamg‘arish va aholiga real narxlarda sotilishini ta’minlash borasida muntazam o‘rganishlar olib borish talabi qo‘yildi.

Shundan so‘ng hokimlar va boshqa mutasaddilar jamiyat hududida turkiyalik mutaxassislar ishtirokida qurilgan maxsus ombor, bu yerda mahsulotlarni saqlash texnologiyasi bilan tanishtirildi.

Ma’lumotlarga ko‘ra, 2024-2025-yillar qish-bahor mavsumi uchun viloyatda qariyb 25 ming tonna shundan, 11 ming 362 tonna kartoshka, 4 ming 460 tonna piyoz, 6 ming 214 tonna sabzi va 2 ming 872 tonna guruch mahsuloti jamg‘arish belgilangan.

Buxoro.uz | Facebook | Instagram | YouTube