Ar-Rohman.uz

НЕГА НАМОЗДА ИККИ МАРТА САЖДА ҚИЛАМИЗ?

Намознинг ҳар бир ракатида нима учун икки мартадан сажда қилинади?
Али ибн Абу Толиб розияллоҳу анҳудан нима учун икки мартадан сажда қиламиз, деб сўрашди. Шунда Ҳазрати Али: "Биз сизларни ердан яратдик, ўлганингиздан сўнг яна унга қайтарамиз. Қиёмат куни эса, сизларни қайта тирилтириб, ердан чиқариб оламиз" (Тоҳa сураси, 55-оят)ни ўқидилар ва: "Биринчи сажда қилганда ва бошни саждадан кўтарганда жасадимиз тупроқдан яратилгани ва яна тупроққа айланишини эслаймиз. Иккинчи марта сажда қилиб, саждадан бошни кўтарганда тупроқдан яна қайта тирилишимизни эслаймиз. Шунинг учун ҳар ракатда икки мартадан сажда қиламиз", дедилар.

https://t.me/ArRohman_uz

Рамазонга оз қолди

Ўн икки ойнинг султони, муборак моҳи Рамазонга ҳам оз фурсат қолди. Ушбу ой қадимдан юртимизда ҳалқимизга хос меҳр-мурувват, бағрикенглик ва саховат ифодаси бўлиб келган. Ўтган солиҳлардан: «Рамазон ойини қандай кутиб олардинглар?» деб сўралганида, улар: «Биз янги ойни бошқа мусулмонларга нисбатан заррача ҳам гина адоват, кек сақламаган ҳолда, қалбимизни поклаган тарзда қаршилар эдик», дея жавоб берган эканлар.

Рамазон ойларнинг султонидир.
Ибн Аббос розияллоҳу анҳумодан ривоят қилинади:
«Набий соллаллоҳу алайҳи васаллам: «Ойларнинг энг афзали Рамазон ойидир», деганлар.

Имом Табароний ривот қилган.

Бу ҳақиқатни қуйида келадиган сатрлар ҳам тасдиқлайди.

Рамазон Қуръон ойидир. Рамазоннинг энг буюк фазилатларидан бири – бу унинг Қуръон ойи эканидадир. Аллоҳ таоло Ўзининг сўнги китоби, Қиёматга боқий қоладиган, барчани ожиз қолдирган мўъжиз каломи Қуръони Каримни нозил қилиш учун айнан Рамазон ойини танлаган. Шунинг ўзи бу ойнинг қанчалар улуғ эканини англаш учун етарлидир.

Аллоҳ таоло Қуръони Каримда шундай марҳамат қилади: «Рамазон ойи – унда одамларга ҳидоят ҳамда ҳидояту фурқондан иборат очиқ-ойдин ҳужжатлар бўлиб Қуръон туширилгандир» (Бақара сураси, 185-оят).

«Албатта, Биз У(Қуръон)ни Қадр кечасида туширдик» (Қадр сураси, 1-оят).

Ибн Аббос розияллоҳу анҳумодан ривоят қилинишича, Аллоҳ таоло Қуръонни аввал Лавҳул-маҳфуздан дунё осмонига бутунича нозил қилган ва бу Рамазон кечаларидан бирида – Қадр кечасида бўлган. Вақти-соати келиб, Қуръоннинг Ер юзига, Расулуллоҳ соллаллоҳу алайҳи васалламга нозил қилиниши ҳам айнан Қадр кечасида бошланган.

Кейинчалик ҳар Рамазонда ваҳий фариштаси Жаброил алайҳиссалом Расулуллоҳ соллаллоҳу алайҳи васалламнинг ҳузурларига келиб, у зотга шу Рамазонгача нозил бўлган оятларни такрорлатадиган бўлди. Набий соллаллоҳу алайҳи васаллам вафот этадиган йиллари Қуръонни Жаброил алайҳиссаломга икки бора ўқиб берганлар.

Зайд ибн Собит, Абдуллоҳ ибн Масъуд розияллоҳу анҳумо бу муборак хатмга гувоҳ бўлганлар. Бу хатм манбаларда «арзаи охир» - «сўнги ўқиб ўтказиш» деган ном билан машҳурдир.

Аллоҳим, яқинлашиб келаётган Рамазон ойини бизларга муборак қил!

https://t.me/ArRohman_uz

ТОНГ НУРЛАРИ

Тонг нури зулматини тарқартиб, Билолнинг азони Мадинадаги сукунатни бузди. Расулуллоҳ соллаллоҳу алайҳи васаллам эса тунги ибодат (таҳажжуд)дан толиқиб қолган муборак жисмларига дам бериш учун бу пайтда ухлаётган эдилар. Билолнинг азони янграши биланоқ ўринларидан турдилар.
“Алҳамду лиллааҳил лазии аҳйаанаа баъда маа амаатанаа ва илайҳин-нушуур”.
Маъноси: “Бизни (кичик) ўлимдан қайта тирилтирган Аллоҳга ҳамдлар бўлсин. Барчамиз Унинг ҳузурида тўпланурмиз” – дея оламлар Роббига ҳамд айтгач, ёстиқлари тагидан мисвокни олиб, тишларини яхшилаб ишқаладилар.
“Муснади Аҳмад”, “Саҳиҳул Бухорий” ва “Саҳиҳи Муслим” китобларидан.
Сўнг муаззинга қўшилиб азонни такрорладилар. Билол: “Аллоҳу акбар”, - деса, у зот ҳам: “Аллоҳу акбар”, - дер, “Ашҳаду аллаа илааҳа иллаллоҳ”, - деса, Пайғамбаримиз: “Ва ана (“мен ҳам”)”, Билол: “Ҳаййа алассолааҳ”, - деса, у зот: “Лаа ҳавла ва лаа қуввата иллаа биллаҳ”, Билол: “Ҳаййа алалфалааҳ”, - деса, у зот яна: “Лаа ҳавла ва лаа қуввата иллаа биллаҳ”, Билол: “Аллоҳу акбар”, - деса, у зот ҳам: “Аллоҳу акбар”, - дер, Билол: “Лаа илааҳа иллаллоҳ”, - деса, у зот соллаллоҳу алайҳи васаллам ҳам: “Лаа илааҳа иллаллоҳ”, - дер эдилар.
“Муснади Аҳмад”, “Сунани Абу Довуд”, “Саҳиҳи Ибн Ҳиббон” ва “Саҳиҳул Бухорий” китобларидан.
Пайғамбаримиз соллаллоҳу алайҳи васаллам ҳам азондан кейин айтиладиган махсус дуога умматларини одатланишга ундар ва уларни азондан кейин қандай ҳожат бўлса, Аллоҳдан сўрашга тарғиб қилар эдилар.
Имом Бухорий ривоят қилган ҳадисда бу ҳақда шундай дейилган:
Жобир ибн Абдуллоҳ розияллоҳу анҳумодан ривоят қилинади:
“Расулуллоҳ соллаллоҳу алайҳи васаллам: “Ким азонни эшитганида: “Аллоҳумма! Робба ҳазиҳиддаъватит-таамма, вас солаатил қооима, аати Муҳаммаданил-васийлата вал-фазийла. Вабъасҳу мақоомам маҳмууданиллазии ваъадтаҳ”, - деса, қиёмат куни унга шафоатим вожиб бўлади”, - дедилар”.
Дуонинг маъноси: “Аллоҳим, эй ушбу тугал азоннинг ва тўкис намознинг Робби! Муҳаммадга васила ва фазилат бергин ҳамда уни Ўзинг ваъда қилган “Мақоми маҳмуд”да тирилтиргин”.

“Расулуллоҳ (соллаллоҳу алайҳи васаллам)нинг бир кунлари” китобидан.

https://t.me/ArRohman_uz

✅   Ҳижрий ойлар

  Ҳижрий йил ҳисоби бўйича 12 ой мавжуддир. Бу ойларни ҳар биримиз билишимиз ва фарзандларимизга ўргатишимиз лозимдир. Чунки, Рамазон ойи, ҳаж ойи, мавлид ойи  ва бошқа ибодат ойлари ушбу хижрий ойларига боғлиқдир:


  1. ➡️Мухаррам - المحرم
  2. Сафар - صفر
  3. Робийуль-аввал - ربيع الاول
  4. Робийусь-соний - ربيع الثانى
  5. Жумадуль-увлa- جمادى الأولى
  6. Жумадуль-ахир - جمادى الآخرة
  7. Ражаб - رجب
  8.  Шаъбон -شعبان
  9. Рамазон - رمضان
  10. Шаввол - شوال
  11. Зул-қаъда - ذوالقعدة
  12. Зул-ҳижжa - ذو الحجة

https://t.me/ArRohman_uz

إِنَّ صَاحِبَ الشِّمَالِ لَيَرْفَعُ الْقَلَمَ سِتَّ سَاعَاتٍ عَنِ الْعَبْدِ الْمُسْلِمِ الْمُخْطِيءِ أَوِ الْمُسِيءِ، فَإِنْ نَدِمَ وَاسْتَغْفَرَ  اللهَ مِنْهَا أَلْقَاهَا وَإِلَّا كتب وَاحِدَةً

Умома родияллоҳу анҳудан ривоят қилинади, Росулуллоҳ соллаллоҳу алайҳи васаллам дедилар:

"Албатта, агар Аллоҳнинг мусулмон бандаси хато ёки гуноҳ қилса чап томон (фариштаси) олти соат давомида қаламини кўтариб (банданинг ўша амалини ёзмай) туради. Агар (банда) надомат қилиб ўша амалига Аллоҳга истиғфор айтса, (фаришта) уни (гуноҳни) улоқтиради (ёзмайди), йўқса унга (бандага) бир (гуноҳ) ёзилади."

Табароний, "Муъжамул кабир", 7765; Абу Нуъайм, "Ҳилятул авлия", 6/124; Байҳақий, Шуъабуй ийман", 2/349/1; Ваҳидий, "Тафсир", 4/85/1. Ҳасан ҳадис.

https://t.me/ArRohman_uz

#Расулуллоҳ_мўъжизалари
42-мўъжиза
Тошчаларнинг тасбеҳ айтиши

Абу Зарр розияллоҳу анҳудан ривоят қилинади:
«Мен Набий соллаллоҳу алайҳи ва салламни ёлғиз, хилватда топсаму, у зотдан баъзи нарсаларни сўрасам, деб юрардим. Кунлардан бир куни у зот соллаллоҳу алайҳи ва салламнинг уйларидан чиққанларини кўрдим. Хизматчидан сўрасам Набий соллаллоҳу алайҳи ва саллам уйда эканларини айтди.
Уйга кирдим, у зот соллаллоҳу алайҳи ва саллам ёлғиз ўтирган эканлар, менимча, ваҳий ҳолатида эдилар. Салом бердим, алик олдилар ва нима учун келганимни сўрадилар. Мен Аллоҳ ва расули учун келганимни айтдим. Ўтиришга буюрдилар, ёнларига ўтирдим. Ўзлари бирор нарса демагунларича мен ҳам ҳеч нима демасдан сукут сақлаб турдим.
Кўп ўтмай Абу Бакр шошилиб юриб келди ва салом берди. Алик олдилар ва нима учун келганини сўрадилар.
У Аллоҳ ва расули учун келганини айтди. Қўллари билан ўтиришга ишора қилдилар, у ўзи ва у зот соллаллоҳу алайҳи ва саллам ўрталаридаги тепалик устига ўтирди. Абу Бакр жойлашиб ўтириб олгач, унга ишора қилдилар, у менинг ўнг томонимга келиб ўтирди.
Сўнг Умар келди ва у ҳам шундай қилди. Набий соллаллоҳу алайҳи ва саллам унга ҳам, ўша тепа жой устига, Абу Бакрнинг ёнидан ўтиришига буюрдилар.
Сўнг Усмон келди ва салом берди. Саломига алик олгач, нима учун келганини сўрадилар. У Аллоҳ ва расули учун келганини айтди. Қўллари билан ўтиришга ишора қилдилар, у ҳам тепалик устига ўтирди. Сўнг яна ишора қилдилар, Умарнинг ёнига ўтиб ўтирди.
Набий соллаллоҳу алайҳи ва саллам сўзладилар, мен: “Оз қолдилар”, деганларидан олдинги сўзларни яхши тушунмай қолдим. Сўнг қўлларига саккиз­тўққиз ёки шунга яқин тошларни олдилар. Тошлар у зот соллаллоҳу алайҳи ва салламнинг қўлларида хурмонинг инграшига ўхшаш овоз чиқариб, тасбеҳ айтди.
Сўнг уларни мендан ўтказиб, Абу Бакрга узатдилар. Улар Абу Бакрнинг қўлида ҳам тасбеҳ айтди. Сўнг уларни унинг қўлидан олиб ерга қўйгандилар, яна овоз чиқармайдиган оддий тошга айланиб қолди.
Сўнг уларни олиб Умарга узатдилар. Улар Умарнинг қўлида ҳам Абу Бакрнинг қўлида тасбеҳ айтгандек тасбеҳ айтди.
Сўнг уларни унинг қўлидан олиб ерга қўйгандилар, яна овоз чиқармайдиган оддий тошга айланди.
Сўнг уларни олиб Усмонга узатдилар. Улар Усмоннинг қўлида ҳам Абу Бакр ва Умарнинг қўлларида тасбеҳ айтгандек тасбеҳ айтди.
Сўнг уларни унинг қўлидан олиб ерга қўйгандилар, яна овоз чиқармайдиган оддий тошга айланиб қолди».
Байҳақий 6/64–65 ва Суютий 2/74-ривояти.

https://t.me/ArRohman_uz