Замира Абдуллаева dan repost
Депутат аниқланган муаммоларни бартараф этиш чораларини бошлаб юборди
Халқ депутатлари вилоят Кенгаши депутати Содиқжон Содиқов Хонқа туманидаги “Тома”, “Дургадик”, “Қутлуғ қадам” маҳаллаларида бўлиб, сайловчилари билан учрашди ва очиқ мулоқотлар давомида сайловчиларини қийнаб келаётган муаммоларини ўрганди.
Ўрганишлар жараёнида “Тома” маҳалласида яшовчи Ўктам Хўрозов, Рустам Болтаев ва бошқа фуқаролар томонидан газ балонларнинг ичидаги газалинни тўкмасдан тўлдириш ҳолати кузатилаётгани, маҳаллада жойлашган 3-сон умумўрта таълим мактаби учун спорт зали ва қўшимча бинога зарурият борлиги, Хонқа-Савхоз йўлининг “Тома” маҳалласига киравериш йўли билан туташ жойига светафор мавжуд эмаслиги боис, йўл ҳаракати муаммолари, маҳалладаги Орзу, Нурафшон, Зебинисо кўчаларида электр кучланиши пастлиги сабаб, хонадонларда маиший техникаларга зарар келтирилаётгани, Баркамол авлод кўчасининг таъмирталаблигидан йўловчилар ёмғирли кунларда қийинчиликларга дуч келаётгани тўғрисидаги мурожаатлари депутат томонидан эътиборга олинди ва ечимини топиш чоралари бошлаб юборилди.
Шу маҳаллада яшовчи Гулбика Қўчқарованинг соғлигининг ёмонлашиб бораётгани тўғрисидаги мурожаати жойнинг ўзида қаноатлантирилиб, депутатнинг саъй ҳаракатлари билан бемор ордер асосида вилоят Кўп тармоқли тиббиёт бирлашмасига ётқизилиб, даволанадиган бўлди.
Шунингдек, “Дургадик” маҳалласи раиси Бахтиёр Маҳмудов, маҳалладаги мактабгача таълим ташкилотининг биноси талабга жавоб бермагани учун тегишли ташкилот томонидан тўхтатиб турилгани боис, ҳудуддаги боғча ёшидаги болалар узоқда жойлашган МТТга боришга мажбур бўлаётганини баён этиб, мазкур МТТ биносини дастур асосида янгидан қуриб фаолиятини йўлга қўйиб беришда амалий ёрдам сўраб мурожаат этди.
Маҳалла ҳудудидаги Қутлуғ қадам кўчасини 3,5 км қисмини бетонлаштириш масаласи Халқ депутатлари вилоят Кенгаши сессиясида кўрилгани, аммо халигача маблағ ажратилмаётгани, маҳалладаги 18- умумўрта таълим мактабининг том қисмини таъмирлаш кераклиги, маҳалла ҳудудидан ўтадиган магистрал йўли яқинида жойлашган 6-сон умум таълим мактабига ўтувчи йўлга пиёдалар ўтиш йўлаги ҳамда чароҳага светафор ўрнатиш зарурлиги, 18- ҳамда 6- мактаб ўқувчиларини офтольмолог кўригидан ўтказиш, маҳалладаги Саховат кўчасида жойлашган паст кучланишли трансформаторни юқори кучланишли трансформаторга алмаштириш кераклиги тўғрисида мурожаат этилди.
Очиқ мулоқотлар давомида аниқланган муаммоларнинг барчаси депутат С.Содиқов томонидан эътиборга олинди ва айрим муаммолар жойнинг ўзида ечим топди, айрим муаммолар юзасидан эса тегишли ташкилотлар раҳбарлари номига депутатлик сўрови жўнатилди ва ижроси назоратга олинди.
Учрашувлар давомида мамлакатимизда олиб борилаётган ислоҳотлар, фуқаролар учун яратилаётган имконият ва шароитлар, Давлатимиз томонидан 2025 йилни “Атроф муҳитни асраш ва “яшил” иқтисодиёт йили” деб номлангани, Давлат Дастури лойиҳасининг мазмун ва моҳияти, мақсади тўғрисидаги депутатнинг фикр ва мулоҳазалари сайловчиларнинг диққат марказидан жой олди.
Бир сўз билан айтганда, депутатимизнинг бу каби саъй ҳаракатлари сайловчиларнинг ўз ҳаётидан рози бўлиб яшашлари, юртимизда инсон қадр-қимматини юксалишига ҳамда партиямизга бўлган ишончни тобора ошиб боришига хизмат қилади.
Замира АБДУЛЛАЕВА,
“Адолат” СДП
Хоразм вилоят Кенгаши матбуот котиби.
