Tovba

Azizim, qalbingda bir quyosh kulsin,
Alangalar yonsin ruhi joningda.
Muhabbat gʻururga bosh eggan mahal,
Iymonning isyoni oqsin qoningda.

Ilohiy tuygʻular misli - eʼtiqod,
Xudodan yuz burgan koʻngillar ayanch.
Xoliqning xohishin qilmay e'timod,
Olamning ruhi ham boʻlmaydi tayanch.

Malaklar dunyoga ustun boʻlolmas,
Qonimda koʻpirur mangu xiyonat.
Kuyinchak koʻngilning kamlari toʻlmas,
Zogʻlar bilan toʻlib ketdi diyonat.

Jazavaga aylanar tobora tushlar,
Toki yashayverar insoniy illat.
Ayni kunlar kelib imtihon chogʻda,
Nomayon boʻladi barcha fazilat.

Azizim, qalbingda bir quyosh kulsin,
Mangu yashayversin oliy muhabbat.
Mayli, dunyo toʻlsa tovbaga toʻlsin,
Oxir qiyomatga qolmasin faqat.

© Navroʻz Suvonov