Birinchi suratda Oysha onamiz roziyallohu anha hujralari maketi.
Undagi qabr olamlarga rahmat o'laroq yuborilgan rosululloh sollallohu alayhi vasallam qabrlari.
Nabiylar vafot etgan joylarida ko'miladilar, degan ta'limot sabab u zot sollallohu alayhi vasallam mana shu yerga ko'milganlar.
Keyinroq Oysha onamizning otalari Abu Bakr roziyallohu anhu vafot etganlar va u zot ham rosululloh sollallohu alayhi vasallam yonlariga ko'milganlar. Hurmat o'laroq rosululloh sollallohu alayhi vasallam yelkalari barobar qilib qabrga qo'yilganlar.
Ko'plab yillar o'tgach Umar roziyallohu anhu ham vafot etganlar va Oysha onamiz roziyallohu anha o'zlari uchun niyat qilganlari keyingi joyni Umar roziyallohu anhuga berganlar.
Umar roziyallohu anhu ham Abu Bakrga ehtirom o'laroq u zotning yelkalari barobarida qabrga qo'yilganlar.
Oysha onamiz endi ularga nomahram zot - Umar roziyallohu anhu yerga ko'milgani uchun xonalari o'rtasida shunday devor yasattirganlar.
Buni ikkinchi suratda ko'rishingiz mumkin.
Oysha onamiz o'zlari vafot etganlarida esa Baqe' qabristoniga ko'milganlar.
Bu qissada Oysha onamiz roziyallohu anha qanday buyuk inson ekaniga dalolat qiluvchi ikki nuqta bor:
1. O'zlari rosululloh sollallohu alayhi vasallamni qattiq sevsalar va rosululloh sollallohu alayhi vasallam va otalari Abu Bakr oldidagi joyga ko'milishni istasalar ham, u joyga Umar roziyallohu anhu haqliroq ekanini e'tirof etib, u joyni Umar roziyallohu anhuga berishlari. Bunda birovlarning o'zidan afzalligini e'tirof eta olishda va o'zi istagan maqomga loyiqroq inson uchraganda uni o'sha insonga berishda ibrat bor. Axir, men rosululloh sollallohu alayhi vasallam eng ko'p muhabbat qilgan odamman, yonlaridagi otam, bu mening uyim, bu joyni bermayman desalar bo'lardi. Biroq unday qilmadilar.
2. Qabrda bo'lgan Umar roziyallohu anhudan hayo qilishlari va u zot sabablaridan uylari o'rtasida devor qurdirishari hayoning bag'oyat go'zal namunasi bo'lib, albatta bu ishlarida ham bizlar uchun ibrat bor. Devor sabab shundoq ham tor va kichik uylari yanayam torayib ketgan. Ular bu hujralaridan zarurat bo'lmagan hollarda deyarli chiqmaganlar. Shunga qaramay qabrdagi Umar roziyallohu anhudan satr qilib, qabr tomonga faqat o'rgangan - yuzlarigacha berkitgan holda o'tganlar.
Alloh taolo Oysha onamizdan rozi bo'lsin! U Zotni Jannatda eng buyuk mukofotlar bilan mukofotlasin! Bizning zurriyotlarimizdan u zot kabi faqiha-olima ayollarni chiqarsin!
Bizlarni rosululloh sollallohu alayhi vasallamga o'xshagan, Abu Bakr, Umar, Oysha roziyallohu anhumlarga o'xshagan chin mo'minlardan qilsin!
@MahmudUsmon
