Hozir ko‘p eshitadigan gapim: "Uylanish kerak."
Postim boshlanishi bilan ko‘pchilik bunga qarshi fikr bildirishga shoshilishi mumkin, lekin biroz sabr qilib, bu savollarni o‘ylab ko‘ring:
- Hayotingizda maqsad va rejalaringiz yo‘qmi?
- Sizga ishonch bildirgan va muvaffaqiyatingizni intizorlik bilan kutayotgan insonlar bormi?
- Xo‘sh, uylangansiz, keyin nima qilmoqchisiz?
- "Rizq Allohdan," deysiz, lekin shunchaki uyda xotiningiz bilan yotib olasizmi?
Shu savollarga javob izlang. Balki hozir ikkilanayotgandirsiz, lekin baribir bu mavzu haqida o‘ylanib turgan bo‘lsangiz kerak. Men bu gaplarni 15-22 yosh orasidagi insonlardan ko‘p eshitdim. Bu achinarli, chunki O‘zbekistonda yoshlar uchun imkoniyatlar yaratilib berilayotgan bir paytda, ularning ko‘pchiligi oila qurish haqida o‘ylamoqda.
Ba’zi odamlar aytadi: "Abdukarim PDP universitetiga kirib o‘zgardi, kibrlanib ketdi." Ha, men o‘zgardim, lekin kibrlanmadim. Faqat dunyoqarashim kengaydi va rivojlanishni boshladim. PDP Universityda shunday talabalardan birini ko‘rdim: u yoshi kattaroq, oilali bo‘lib, o‘qishni chin dildan xohlardi. Biroq o‘qishni tashlab ketishga majbur bo‘ldi. Sababi nimada? Oila. Shu ikki oy ichida shunga o‘xshash taqdirlarni juda ko‘p ko‘rdim.
Ba’zilar shunday deydi: "Abdukarim, sening taxminlaring ko‘pincha to‘g‘ri chiqadi. Bunga qanday erishasan?" Javob oddiy: bu mening fikrlarim emas, balki atrofimdagi odamlarning hayotini tahlil qilishimning natijasi. Hayotda insonlarning muammolari ko‘pincha bir-biriga o‘xshash bo‘ladi. Shuning uchun atrofingizdagi odamlarning chiroyli hayotiga emas, ularning o‘tmishdagi xatolariga e’tibor bering va ulardan xulosa chiqaring.
Men sevgi haqida ko‘p gapira olaman va uning oxiri yomon tugashini kafolat bilan ayta olaman. Mister Trevis aytganidek: "Hech qachon ikki quyonni bir vaqtning o‘zida tuta olmaysan." Oila shunchaki turmush qurish emas. Bu ikki insonning farzandi hayotida eng qadrli bo‘lgan qizni o‘z mas’uliyatingizga olishdir.
Endi tasavvur qiling: siz o‘z maqsadlaringizga hali erishmagansiz, lekin oila qurdingiz. Oilaviy muammolar paydo bo‘ladi va e’tiboringiz hamda kuchingizni karyeraga emas, oilaga qaratishga majbur bo‘lasiz.
Karyera va oila o‘rtasida kuchni teng taqsimlashning iloji yo‘q. Shu sababli, avvalo karyerangizni rivojlantiring, o‘zingizni shakllantiring. Keyin esa oila qurish haqida o‘ylang. Shunda siz kuch-quvvatga to‘lgan bo‘lasiz va hayotda o‘zingizga qo‘ygan maqsadlaringizga erishgan holda, bir oilani boshqaradigan erkak bo‘lib, ayolni ham baxtli qila olasiz.
Yodingizda tuting: Birinchi qasr, keyin esa qirolicha.
